- أبو عزمي دخلك وشو قصتو هاظ الإنجليزي إلي بكولولوا(اسمه) جالوي رايح جاي على غزة.
- هاظ يا إمسخمه بيجيب تبرعات من ابلاد "التشفار"(الكفار)..
- إيه يكطع شره.. والمسلمين ما لهم..
- يا حرمة.. المسلمين مش فاضيين.. مشغولين بورثة اولادهم وبالوزارات وبالمخترات.. بيروحوا مخاتير وبيجيبوا مخاتير إجداد.. بيعمروا أبراج.. وبسيجوا الحدود بالفولاذ.. وبكتلوا النسوان والاولاد والزلم في اليمن.. قال من القاعدة.. وخايفين من نووي إيران.. وبصلوا بالجوامع.. وبيروحوا ع الحج والعمرة.. ما هم إمبشرين بالجنة.. و"التشفار" مثل جالوي بطعموا وبعالجوا اهل غزة..
وخلال تعليلة أبو وأم عزمي وإذا بخبر عاجل على شاشة الجزيرة:"أصدر قاض بريطاني مذكرة توقيف لاعتقال ليفني بتهمة اقترافها جرائم حرب في غزة...."
- ها.. ها.. شوفي وكمان "التشفار" بدهم يسجنوا ليفني..
- أبو عزمي.. وإن ما خانتني ذاكرتي.. وعلى علمي مش هاي ليفني كانت قبل أسبوع في ابلاد المسلمين.. المغرب.. مالهم ما سجنوها..
- ههههههههههههههههه.. آه.. آه.. مهي ليفني.. صابتهم بالعين.. هاي.. يا ويلي عليها.. بتوقع الزلم.. حلوة.. حلوة.. وشكرا(شقرا) مثل الشمس..
- دير بالك يا أبو عزمي لا تصيبك بالعين ملعونة ها الوالدين..
- ولك.. أنا..؟! وشو الصوص وشو مرقته.. هاي ليفني بتصيب المسلمين "الفولاذيين".. مش المسلمين الميتين مثلي ولا "التشفار" مثل جالوي.. وهاظ هو إلي بيجيب شريان الحياة لغزة.. والمسلمين إلي صابتهم ليفني بعينها الزايغة هاظ هم بعدهم بحرسوا اسرائيل بالفولاذ والمال والعيال.. وبعدهم كذابين بنسوا كذباتهم مثل صياد الغزلان الكذاب..
- وشو سولافته.. يا أبو عزمي..
- إسمعي.. هاظ الصياد الكذاب مرة بسولف في الديوان: "اسمعوا يا جماعة الخير: أنا مرة إطلعت للصيد.. شفت غزالة( يقاطعه البعض: يعني مش غزال..) آه.. غزالة.. غزالة.. عمك بعرف شغلته.. إكمنت.. زحفت على بطني.. لاحقتها.. وها.. ها.. تا صارت بمرمى "الجفت".. بووووووووو.. جعدلتها.. حملتها على كتفي ممسكا بإيديها ورجليها" وهو قاعد بيسولف دخل أحدهم.. سلم على الحضور وانشغلوا برد التحية قليلا.. وعاد الصياد لحديثه لكنه نسي؛ كعادته، "وين وصل بسولافته"، فذكروه بأنه حط إيديها ورجليها فوق اكتافه؛ عندها تابع قائلا:"وسهرت معها للصبح.. ليلة من العمر.."..؟؟!!
- أبو عزمي.. يمكن لحقتك إسخونة.. كوم.. كوم.. للحمام قبل ما تنام.. يا شريان حياتي يا أبو عزمي...
الثلاثاء ديسمبر 22, 2009 9:32 am
